مش عيب

أنت حمار .. كلمة أكيد إنتو سمعتوها زيي .. ( مش قصدي .. محدش يفتكر حاجة لا سمح الله ) أنا قصدي أكيد سمعتوها من حد بيقولها لحد تاني .. المهم .. أنا بقي سمعتها بوداني يوم ما كنت قاعد علي القهوة لا ليا ولا عليا كان جنبي بشويتين شوية شباب قاعدين بيضيعوا وقت زيادة ماهو ضايع .. ما علينا .. كانوا بيهزروا مع بعض وفي وسط الكلام لقيت واحد منهم بيقول للتاني بحنجرة قوية .. انت حمار يا بني ..
مش عارف أية اللي خلاني التفت لا إرادياً لما سمعت الكلمة دي .. حسيت إنه بيقولها لي أنا ..بصيت حواليا لقيت ولا واحد واخد باله من حد كل واحد في موضوعه .. إتعدلت في قعدتي وعدلت نضارتي علي وداني.
باختصار باظت اللليلة يا معلم .. سرحت بدماغي لبعيد قوي وسألت نفسي .. هو صحيح أنا حمار ؟؟ .
العجيب ( وبيني وبينكم ) إني اكتشفت بعد استرجاع سريع لبعض مواقف حياتي إن حضرتي فعلاً حمار..
طيب وهو دة عيب .. مش عارف ؟؟